منقول: ليه مجلس رئاسى مدنى دلوقتى عشان :
١. حصل تزوير فى الانتخابات لصالح شفيق ضد صباحى وابو الفتوح واللجنة العليا للانتخابات مقبلتش الطعن بتاعهم .. طب مهو حازم قبلك خرج وكان معاه حكم واللجنة العليا مقبلتش طعنه ورضينا وقلنا نحترم القانون عشان ندخل الانتخابات لأن ده فى مصلحتك.
٢. تطبيق قانون العزل وخروج شفيق…طيب ماهو قانون العزل كان موجود قبل الانتخابات ومطبقش على شفيق ورضيت ودخلت الانتخابات لأنك كنت شايف فرصتك كويسة وممكن تنجح.
٣. الحكم فى قضية مبارك والعادلى ومساعديه وحقوق الشهدا…طيب مالظباط وامناء الشرطة والعساكر اللى قتلو المتظاهرين بنفسهم قبل كده خدوا براءة وده كان متوقع و من قبل الانتخابات اشمعنى دلوقتى ركزت مع حقوق الشهداء
أنا مش ضد المطالب دى كلها بالعكس انا معاها تماما وكان نفسى فيها من زمان.
انا ضد استغلال هذه المطالب لصالح ظروف واشخاص فى اوقات معينة عشان مصالح شخصية لأن مصلحة البلد أهمّ.
أنا ضد الابتزاز السياسى لمرسى وان كنت لا أتفق مع الاخوان المسلمين فى اغلب المواقف وانك لازم تعمل مجلس رئاسى والا مش حدعمك فى الاعادة مع انك لو كنت مكانه فى الاعادة كنت حتكمل.
أنا ضد فكرة استغلال حشد الناس وكرههم للاخوان واللعب على عواطفهم للضغط على الاخوان عشان ينفذوا مطالبى وإلا يعتبروا خانوا الثورة مع انك كان قدامك فرصة للاتحاد قبل الانتخابات بس مرضتش ومحدش خوّنك.
أنا ضد فكرة عدم دعم مرسى كخيار مطروح من بعض القوى الثورية لأن ببساطة اللى ضده فى المنافسة شفيق، أنا حنتخب مرسى عشان أسقِط شفيق.
الحل ليس فى المجلس الرئاسى
الحل فى دعم مرسى مع اخذ ضمانات زى وثيقة الاتفاق الوطنى
ويبقى بكده الكل قدم تنازلات والمركب تمشى
والا فكك من الحوار ده وكل واحد يشوف مصلحته
بس متجيش تقولى اهداف الثورة ومصلحة الوطن والكلام الحمصى ده
(منقول)
